كل حاجة بايد الام والاب

انا سعيدة بجوازي ومبسوطة مع زوجي جدا  فجاه جوزي جة في يوم عادي قالي انا كمان كام شهر #هتجوز عليكي  وهجيب واحدة زي القمر تقعد معانا في بيتنا الجميل دا وانتي لازم تحبيها عشان دا فرض عليكي ، بقي مهتم بمراته وبيجهز لاستقبالها وبيشتري هدوم وبيتكلم عليها  وهي بتغير في طريقة لبسة هو صحيح متغيرش معايا ❤ بس انا جوايا حاسه اني #اتركنت خلاص عالرف فجاه اتجوز وجابها قعدت معانا بس الهانم عايشة فيها الدور  انها مبتعرفش تاكل فبياكلها فبوقها ومبتعرفش تعمل حاجة من غيرة فهو بيعملها كل حاجة وبيقولي وطي صوتك عشان نايمة ومتقعديش هنا عشانها هو متغيرش معايا بس انا مش قادرة بتقطع من جوايا احساس #بالغيرة قاتلني ولما هو بيحبني بزيادة بستهبل الصراحة ولما مبيعبرنيش بحس اني عايزة اموتها كدة  حاولت اتدلع زيها لقيتة صدني وقالي انت كبرتي عالكلام دا قولتله مبحبهاش قالي لازم تحبيها غصب عنك قلتله خرجني وحبني يقولي مش فاضي وانزلي روحي اي مشوار وسيبنا لوحدنا مع بعض 

تخيل #صراع الافكار اللي جوايا كزوجة كبيرة عاقله قادرة تميز افكارها ومشاعرها

قيس بقي القصة دي بس علي طفل مامته جابتله اخ 

الطفل اللي مامتة بتجيبه له اخ مجرد مابيعرف يعيني ان مامتة حامل او يحس بيبقي عندة قلق فظيع وخوف قوي ان مكانته هتضيع ومبيعرفش يعمل ايه غير شوية تصرفات غريبة وجديدة ومريبة و بعد ما الام بتخلف

اما بتاكدله ان هو لسه #الحب_الاول فيكون واثق في نفسة  شوية فيقدر يتعامل مع الغيرة دي او العكس ان يبان فعلا انه اتركن عالرف 
ساعتها بيبدا يشتغل علي شوية تصرفات
يلفت #الانتباه بيها زي انه يعمل حاجات تخلي الام  علي طول مشغوله بيه حتي لو تصرفات  غلط يضرب يكسر يعند وحاجات من هذا القبيل لو الام عاقبت هيزيد فيها ولا تساهلت هيزيد فيها برضة 

يبقي خير الامور #الوسط  ⬇

_ادوهم حب ودا ليه طرق كتير دوروا واعرفوا مدخل ولادكم ازاي .

_اشغلوا وقتهم عشان ميبقوش فاضينلكم وفاضين يخزأوا عين اخواتهم  ودي برضة دوروا فيها برضه .

_لما يعملوا التصرفات دي تجاهلوها وجهوا تصرفاتهم لحاجة تانيه من غير عقاب ولا اهانة يعني مثلا لما ييجي يضرب النونو او يضربك امسكي ايد ابنك وسقفي او العبي البيضة او امسكي ايد النونو  اي حاجة #متحسسيهوش انه قدر يلفت انتباهك بالضرب خليه يلفت انتباهك بحاجات تانية ايجابيه عشان يفتكر انك بتيجي كدة ودا محتاج تخطيط قوي جدا منك.

_خليه يختار حاجات ليه بمزاجة.  وبلاش جو النونو جابلك هدية هو مش ثري عربي احترموا عقلهم.

_هاتيله #عروسة لعبه يتدرب فيها واجهزة ازاي هيتعامل مع اخوة .

_لازم تحضروا ولادكم قبل ماتولدوا وتشيلوهم مسئوليات بسيطة استعدادا لدا.

_عشان خاطري بالله عليكوا متنزلهومش #حضانه اول ماتولدوا يا قبلها بفترة كبيرة يا بعدها بفترة كبيرة متحسسهومش ان دا #عقاب ليهم يكرهوكوا ويكرهوا التعليم عاللي اخترعه.

_تحكولهم #حواديت عن الاخوات عشان هما مش بيتولدوا ببحبوا بعض دي حاجة مكتسبة. ❤

ومهما عملتي عمر ابنك ماهيتقبل وجود الطفل التاني لو حس ان مكانته اتهزت #فسوة 
طبيعي ان المشاكل تحصل بس ميبقاش دا اسلوب حياه العيال طبيعي ببخانقوا ويضربوا بعض بس مش عرض مستمر

كل حاجة بايد الاب والام ❤

#ضرة_لابنك
#غيرة_الاخوات