النصائح الذهبية لافساد الحياة الزوجية
ايوة زى ما قرأتوها بالظبط ..طول الوقت بنقولكم نصايح للسعادة الزوجية تعالوا بقى نعكس الامر ونشوف بنعمل ايه من الذهب اللى هيتقال ده علشان نعيش حياة بائسة مع شريك حياتنا البائس ..ورقة وقلم وركزوا معايا
1- انقدوا بعض طول الوقت ..انتقديه قولليله عمرك ما عيشتنى لحظة حلوة ..قوليله غيرنا مبسوطين وبيخرجوا وانت مش عارف تعمل زى جوز اختى او زميلتى ...حسيسيه بانه ولا حاجة اديله مترحميهوش 😃 ...وانت اوعى تسكت انتقدها قولها انتى تخنتى ..انتى خسيتى ..وشك كرمش ..قولها شايفة الستات الحلوة مش انتى ! 😒..اهدم انثوتها ...
2-زنى زنى زنى زنى زنى كمان مرة افضلى زنى عليه واتصلى عليه كل شوية غرقيه رسايل وطبعا هيزهق منك ومش هيسأل فيكى فتتخانقوا فتقوليله انت مبتحبنيش ايوة اوعى تقولى ان ده احساسك اتكلمى عن الامور السلبية بيقين ..وانت كمان اهملها قولها انتى زنانة وانتى مش مقدرة الضغوط اللى عليا
3_اوعى تتكلمى عن مشاعرك او احتياجاتك احسن تبقى ست مش تمام بعدين يفكر فيكى بطريقة وحشة ..افضلى كده اهرى وانكتى فى نفسك شمعة تحترق لحد ما البيت كله يولع وتنوروا الدنيا كلها ياحبايب قلبى ....😃
4-لو فكرتى تطلبى اى حاجة او تتكلمى عن احتياجات اختارى الوقت الغلط ..اضربى بوظ اول ما يجى من الشغل وابدئي فى طلباتك او اقولك استنى لما تيجوا تاكلوا .. او فى وسط الخناق ..الكلام عن الاحتياجات بعد كل ده
😃 بيجيب نتايج مبهرة واسألى فى محكمة الاسرة
5-كل شوية قوليله انت مش بتحبنى انت هتتجوز عليا شكى فيه شكى شكى كمان لحد ما يجيب دم ويبدأ يفكر فعليا فى ليه لا ما هى فكرة مش بطالة 😃
6-هددها كل شوية بالطلاق وانك هتسيبها كده تضمن انها تتحمل ارفك وذكائك الخارق ..فكرة اتهرست فى 100 فيلم عربى وعلشان كده محدش
😎 هيتوقعها 😃 ..اوعى تحسسها بالامان..اوعى تطمنها اوعى
7-حسسيه انه اقل منك وانك وافقتى به شفقة على شبابه المأسوف عليه وان كان جايلك 5 طيارين واربعة ظباط واتنين شاورمة وواحد بابا غنوج ..بس
😕 انتى اتنازلتى ووافقتى عليه علشان حظك النحس ..
8-متاخدش رأيها فى اى حاجة رأى الست بيجيب الخراب ..ست ايه ياراجل اللى هتاخد رأيها دول ناقصات عقل ....انت راجل لازم رأيك يبقى من دماغك
9-لوميه ..اول ما يحصل حاجة غلط لوموا بعض..لما الولاد يعملوا حاجة غلط قولها تربيتك يا هانم ....هم ولادها مش ولادك ..انت يادوب تعطفت عليها ومنحتها حيوان منوى نادر الوجود ..كفاية عليك هى كانت تحلم ... شماعتكم بقى وحيلكم الدفاعية وانزلوا على دماغ بعض بيها
10_احكوا مشاكلكم لاهليكم وطلعوا العبر فى بعض ..ولما تتصالحوا اهاليكم هيفضلوا فاكرين السواد اللى حكيتوه وهيبقوا على تكة ومستنين الغلطات القادمة
بالتصرفات دى انتوا واخدين الدولى مش هيبقى فيه مطبات ولا حفر نحو حياة زوجية بائسة و لو استمريتوا شوية هتبقى النهاية التعيسة فى محكمة الاسرة او عند مأذون واحنا كدكاترة نفسين موجودين علشان اعادة التأهيل وتخطى ما يمكن تخطيه .....ياترى بتعملوا كام حاجة من العشرة فى حياتكم وانتم مش واخدين بالكم ؟!
